Amagoia Arrieta boccia kirol-jokalaria omendu du Debak, musika bandaren eta herriko kirol elkarteen babesarekin

2024ko azaroaren 16a

● Ekitaldian, bertsolariek bertsoak abestu dizkiote, eta alkateak txapela jantzi eta lore sorta bat eman dio Arrietari, bere ibilbidea ospatuz.

Gaur goizean, Debako Udalak omenaldi hunkigarria eskaini dio Amagoia Arrietari, herritarren, musika bandaren eta kirol elkarteetako ordezkarien babesarekin.

Arrietak boccia kirol modalitatean jokatzen du eta bere ibilbidearen baitan hainbat lorpen nabarmen izan ditu, horien artean azkena abuztuaren amaieran Parisko Joko Paralinpikoetan parte hartuz. Egindako esfortzuari eta lanari esker, mundu mailan seigarren postua lortu du BC1 kategorian. Gainera, urrezko domina irabazi zuen Rotterdameko Europako Txapelketan eta zilarrezkoa Zagrebeko Challenger txapelketan, boccia kirolean egindako ibilbide oparoa eta emaitza bikainak erakutsiz.

Esfortzuaren eta gaitasunaren ikur

Hala, gaur goizeko omenaldiaren bitartez, Debako Udalak aitortza egin nahi izan dio Arrietari, zailtasunak zailtasun, bere ibilbidean zehar uneoro erakutsitako esfortzu eta konpromisoagatik. “Boccia jokalari gisa Amagoiak orain arte egin duen bidea lan handiaren, konstantziaren eta esfortzuaren isla da eta lorpen guztiak bere esfortzua, gaitasuna eta, nola ez, Amagoiaren talentua erakusten dute, baina, batez ere, bere etengabeko hobekuntzarako gogoa eta lanerako prestutasuna. Hori guztiagatik Debaren eta debarren izenean, eskerrak eta zorionak ematen dizkiot, bihotz-bihotzez”, adierazi du Alazne Txurruka alkateak.

Ekitaldia Arrietaren etxean hasi da; bertan musika bandak harrera egin dio eta kalejira abiatu dira Foruen Plazaraino. Udaletxeko plazara iritsi denean, herriko kirol elkarteetako ordezkari eta jokalariek ohorezko pasillo bat egin diote arkuekin, haren kirol ibilbideari aitortza egiteko eta ondoren, udaletxean bertsolariek bertsoak eskaini dizkiote Arrietari. Une unkigarri horren ostean, Debako alkateak txapela jantzi eta lore sorta bat oparitu dio, haren ibilbidearen eta konpromisoaren aitortza gisa.

Herritar ugari hurbildu dira ekitaldira, eta Arrietak esker onez jaso ditu Debako herriaren aitortza eta harrera beroa.