Debak herriko argiteria publikoa hobetuko du, Europako Next Generation funtsen dirulaguntzarekin

2025ko urtarrilaren 14a

Esku-hartzeak eraginkortasun energetikoa hobetuko du eta udalerriko argi-kutsadura murriztuko du. Europar Batasuneko Next Generation funtsek 100%ean finantzatutako proiektuak 130.000 eurotik gorako aurrekontua du, eta behin lizitatuta, 120 eguneko epean egingo da.

Debako Udalak udalerriko argiteria publikoaren sistema berritzeko proiektu bat jarri du martxan, eraginkortasun energetikoa eta jasangarritasuna hobetzeko konpromisoari helduz. Esku-hartzea  Europar Batasunak Next Generation funtsen bidez 100%ean finantzatutako Berreskuratze, Eraldaketa eta Erresilientzia Planaren (PRTR) baitan kokatzen da, eta horren bitartez, LED argiak jarriz, herriko argiztapen publikoa modernizatzea eta optimizatzea ahalbidetuko da.

Proiektuaren oinarrizko aurrekontua 132.750,27 eurokoa da (BEZa barne), eta helburu nagusia da energia-kontsumoa, berotegi-efektuko gasen emisioak eta argi-kutsadura murriztu eta minimizatzea, debarren ikusmen-erosotasuna hobetuz.

Esku-hartzeak Portu kaleko (CM01) eta Astillero kaleko (CM03) aginte-koadroak hartuko ditu, eta 273 argiri eragingo die. Horietatik, 179 unitate LED argi berri eta eraginkorragoekin ordeztuko dira, eta gainerakoek jada teknologia hori dutenez, integratu eta optimizatu egingo dira. Proiektuak koadro elektrikoen egokitzapena eta hobekuntza ere jasotzen ditu, haien funtzionamendu egokia eta indarrean dauden araudiak betetzen direla bermatzeko.

Aldaketak gehienera ere 120 egunetan burutuko dira, behin lanak lizitatu ostean; une honetan, enpresa desberdinak beren proposamenak aurkezten ari dira. Lanak irauten duten bitartean, debar bat bera ere zerbitzurik gabe geratuko ez dela bermatuko da. Gainera, argiak eta argindarra egiaztatzeko ikuskapenak eta probak egingo dira, eta ekipo zaharrak ingurumen-estandarren arabera desmuntatu, sailkatu eta birziklatuko dira.

Ekimen honek Debako Udalak azpiegitura publikoen jasangarritasunarekin eta hobekuntzarekin duen konpromisoa indartzen du.

Ekimenaren Babesleak