Debako gaztelekuak ostiralean, irailak 20, zabalduko dizkio ateak ikasturte berriari

2024ko irailaren 17a

Urtero moduan, 12-17 urte bitarteko gazteei elkargunerako eta aisialdirako espazio inklusiboa eskainiko die gaztelekuak, hezitzailez lagunduta eta eta ekintza sorta desberdinekin. Espazioa ezagutzeko gurasoei zuzenduriko ate ireki saioak egingo dira irailaren 24tik 26ra, 17:00-18:30 bitartean.

Debako Gaztelekuak datorren ostiralean, irailak 20, irekiko ditu ateak 2024-2025 ikasturtea indarrez eta gogotsu hasteko. Gune horrek, urtero bezala, elkargune eta aisialdi-ingurune inklusiboa eskaintzen die 12 eta 17 urte bitarteko gazteei, hezitzaile profesionalen talde batek gainbegiratuta. Jarduera eskaintza zabal baten bidez, Gaztelekuak nerabeen garapen pertsonala eta soziala sustatzen du, harremanak izateko, ikasteko eta aisialdiaz gozatzeko leku seguru eta erosoa bermatuz.

Hala, Gaztelekua doako udal zerbitzu euskalduna da, aisialdi hezitzailea eta bizitzarako prestakuntza uztartzen dituena. Horretarako espazio desberdinak batzen ditu, besteak beste: erabilera anitzeko gela, kirol-eremua, bulegoa edota egongela bat futbolina, ping-ponga, billarra, sofak, proiektorea eta mahai-jokoak dituena. Bere helburu nagusia da nerabeen arteko harremanak eta komunitaterekiko integrazioa sustatzea, arreta berezia eskainiz guztien inklusioari, baita desberdintasun egoeretan dauden pertsonena ere.

Gaztelekua zabalik egongo da urte osoz, asteartetik ostegunera, 17: 00etatik 19: 00etara; eta ostiraletik igandera, jaiegunetan eta jai bezperetan, 17: 00etatik 20: 30era. Era berean, zerbitzua berriki esleitu da eta orain arte bezala, Zehar Heziketa eta Programak elkarteak jarraituko du zerbitzua eskaintzen.

Gurasoentzako ateak zabalik

Familiak Gaztelekuaren espazioa eta funtzionamendua ezagutzeko, ate irekien saioak antolatu dira guraso eta tutoreentzat irailaren 24tik 26ra, 17: 00etatik 18: 30era. Jardunaldi horietan, gurasoek bertatik bertara ezagutu ahal izango dituzte instalazioak, profesional-taldea eta seme-alabentzako jarduera-eskaintza zabala.

Debako Udalak familiei animatzen die Gaztelekuko ate irekien jardunaldietan parte hartzera, bertako instalazioak eta herriko gazteen garapen integralean duen eragin positiboa ezagutzeko aukera paregabea baita.

Informazio gehiagorako 943 19 27 62 telefonora deitu edo debakogaztelekua2@gmail.com helbidera idatzi daiteke.