60 urtetik gorakoen osasun kognitiboa sustatzeko ExerCita programaren modalitate presentziala eskainiko da Deban

2025ko martxoaren 14a

Hainbat urtez programa hau online soilik eskaini ondoren, aurten, aurrez-aurreko saioak berreskuratuko dira, Debako Udalaren eta Cita Alzheimer Fundazioaren artean indarrean dagoen hitzarmenaren baitan. Programaren xehetasunak azaltzeko informazio bilera egingo da datorren martxoaren 19an, goizeko 11:00etan, Arbil Jubilatuen Elkartean.

Debako Udalak lankidetza estua du Cita Alzheimer Fundazioarekin, udalerriko adinekoen osasun kognitiboa sustatzeko. Harreman horren baitan, 2024an, bi erakundeek, besteak beste, ExerCita programa abian jartzea ahalbidetzen duen hitzarmena berritu zuten. Ekimen horren helburua da 60 urtetik gorako pertsonen eguneroko bizitzan funtsezkoak diren funtzio kognitiboak trebatzea, indartzea eta zaintzea.

Aipatzekoa da Deba aitzindaria dela Cita Alzheimer programan, ekimenak udalerrian baitu abiapuntua, beraz, aitzindaria da, baita ere, ExerCita programaren inplantazioan. Aurten, programak izaera presentziala berreskuratuko du, eta parte-hartzaileei estimulazio kognitiboko ariketak taldean egiteko aukera eskainiko zaie, profesionalen zuzeneko laguntzarekin.

ExerCita programaren aurrez-aurreko saioen ezaugarriak

Deban eskainiko diren ExerCita saioak 15 egunean behin egingo dira Arbil Jubilatuen Elkartean, ordu eta erdiko iraupena izango dute eta 15 laguneko talde txikietan antolatuta eskainiko dira. Euskaraz zein gaztelaniaz egingo dira, parte-hartzaileen hizkuntza-ulermena bermatuz. Gainera, eskaeraren arabera, Itziarren talde propio bat egiteko aukera aurreikusten da.

Edizio honetako beste berrikuntza nagusietako bat material didaktikoaren eguneratzea da. Orain arte, programak bost maila eta horietako bakoitzeko bi liburuxka zituen. Aurten hirugarren liburutxo bat gehitu da, eta horrek aurreko edizioetan parte hartu dutenei berriro izena eman eta eduki berriekin lan egiteko aukera eskaintzen die. Online formatuan ere izango du jarraipena aipatu programak, modalitate horretara egokitutako materialarekin. 

Informazio saioa

Datorren martxoaren 19an, programari buruzko xehetasunak emateko informazio bilera egingo da, goizeko 11:00etan, Arbil Jubilatuen Elkartean. Bilera honetan programaren funtzionamendua, saioen ezaugarriak, izena emateko baldintzak eta ExerCitak osasun kognitiboari ekartzen dizkion onurak azalduko dira.