Udal zerbitzuen kalitatea bermatzen jarraitzea lehenetsi du udal gobernuak 2025erako ordenantza fiskaletarako

2024ko urriaren 16a

Bide horretan, udal zerga eta tasen %5eko igoera orokorra proposatu du tokiko gobernuak, orain Udaletik eskaintzen diren zerbitzu oro mantendu eta horien kalitatea bermatzeko. Proposamen horrek udal zerbitzuen kostuen igoerari erantzuten dio, baita, bereziki, azken urteetako udal politiken ondorioei ere.

Debako udal gobernu taldeak 2025erako ordenantza fiskalen proposamena aurkeztu du. Horren baitan, udal zerga eta tasen %5eko igoera orokorra planteatzen du tokiko gobernuak, udal zerbitzuen kostuaren igoera orokorrari aurre eginez, zerbitzu ororen kalitatea bermatzen jarraitzeko helburuz.  Zabor bilketa tasa, halaber, % 8,5 igoko litzateke, Debabarrenako Udal Elkarteak ezarritakoaren arabera.

Jakina da gaur egun inflazio egoera orokorra bizi duela gizarteak eta zerga eta tasen berrikuspen zein egokitzapen hau, hain zuzen, testuinguru horren baitan kokatzen da, egungo egoera horrek nabarmen eragin baitu Udalaren gastu operatiboetan.  Inflazioaz haratago, baina, azken urteetako udal politiken ondorioak ere nabarmendu ditu gobernu taldeak zerga eta tasen igoeraren eragile zuzen gisa. Gobernu taldearen hitzetan: ‘politika hauek erritmo bizian handitu dituzte udal gastuak, eta, orain, etorkizuneko iraunkortasuna bermatzeko erabaki arduratsuak hartzea egokitzen zaigu’. 

Udal gastu igoeren adibide gisa pertsonal gastuen igoera nabarmendu du udal gobernuak, azken lau urteotan milioi bat eurotan handitu baita. ‘Horrelako erabakiek kostu handiago horiek estali ahal izateko tasa eta zergak doitzea eskatzen digu orain, herritarrei eskaintzen zaizkien zerbitzuen kalitatea arriskuan jarri gabe’, azaldu du udal gobernuak.

Neurri honen helburua, beraz, ez da, inondik inora, herritarren presio fiskala areagotzea, debarren ongizaterako funtsezkoak diren zerbitzu publikoak eta horien kalitatea mantentzea baizik. “Jakin badakigu egungo egoera ekonomikoak guztiei eragiten digula, baina ezinbestekoa da udal zerbitzuen jarraitutasuna eta kalitatea bermatuko duten erabakiak hartzea, gure udalerriarentzat garrantzitsuak direlako”, adierazi du gobernu taldeak.

Berrikuspen eta egokitzapen proposamen honekin, zerbitzu publikoak kalitatezkoak eta guztientzako eskuragarriak izan daitezen lanean jarraitzeko konpromisoa berresten du Debako udal gobernuak,  datorren urtean zein etorkizunean ere, debar guztien ongizatea bermatzen jarraitzeko. 

‘Egungo egoeraren jakitun gara eta gure nahia da udal zerga eta tasen igoera ahalik eta neurrikoena izatea, udal zerbitzuen kalitatea bermatzen jarraitzeko helburu irmoarekin. Guretzat funtsezkoa eta lehentasunezkoa da Deba bere azpiegiturak eta zerbitzu publikoak zaintzen dituen udalerria izaten jarraitzea, inor atzean utzi gabe, modu horretara herritarrentzako aukerak eta ongizatea bermatuko dituen etorkizuneko Deba eraikitzen jarraitzeko’, amaitu du udal gobernuak.