Maitasunez beteriko agurra, Salvador Martinezi

2024ko urriaren 10a

Debako Udalak joan den abuztuan, San Roke jaietan, Salvador Martinezi egindako omenaldiaren momentu hunkigarrienak jaso ditu ikus-entzunezko pieza batean, gaiteroak Debari egindako ekarpen handiaren aitortza modura. Lizarrako Gaiteroak taldeko kide gisa, Salvador Martinezen inplikazioa etengabea eta funtsezkoa izan zen Deban, bereziki Debako Erraldoien Konpartsa biziberritzen eta Debarraren Eguneko Erraldoien Alardea antolatzen.

Debak maitasunez beteriko azken agurra eman dio Salvador Martinezi, eta horretarako, Debako Udalak bideo batean jaso ditu San Roke jaietan gaiteroari egindako omenaldiaren momentu hunkigarrienak, herriko buruhaundi eta erraldoi taldearen eskaerari erantzuna emanez. 

“Abuztuko omenaldia bere ibilbidearen eta Salvadorrek Deba zein debarrei egindako ekarpenaren errekonozimendu ekitaldia izan zen eta momentu hura bideo bitartez jasotzea Salvadorren izana eta izena Deba zein debarren artean betirako bizirik mantentzeko modua da”, adierazi dute Udaletik. 

San Roke jaietako ondare

Salvador Martinezek gaitari eskaini zion bizitza eta 1986az geroztik funtsezko pertsona bilakatu zen Deba zein debarrentzat, bereziki herriko jaietan zuen pisuagatik. Jaietako ekitaldietan konprometitua eta erabakigarria izan zen, batez ere Debako Erraldoien Konpartsa biziberritzen eta Debarraren Eguneko Erraldoien Alardea antolatzen. 

Lizarrako Gaiteroak elkarteko kide eta euskal kulturaren sustatzailea

Era berean, Salvador Martinez Lizarrako Gaiteroak taldeko kide nabarmenetakoa izan zen, eta bere ibilbidean zehar hainbat ekitaldi eta jaialditan parte hartu zuen. Gaita-jotzaile izateaz gain, Salvador euskal musika eta kulturaren bultzatzaile handia izan zen. Lizarratik Debaraino, gaita eta danbor irakasle aritu zen hainbat eskola eta kontserbatoriotan, musika tradizionalarekiko bere ezagutza eta grina belaunaldi berriei transmitituz. Deban, bere eragina are sakonagoa izan zen, gazteei irakasteaz gain, Debako Gaita Talde sortzea bultzatu baitzuen, non bertako musikan erreferente izaten jarraitzen duen.

Ikusi hemen Debak Salvador Martinezi maitasunez emandako azken agurra.