Zaintza Ekosistemari buruzko aurkezpen ekitaldia ekainaren 30ean Herriko plazan

2024ko ekainaren 21a

Debako Udalak adineko pertsonen beharrei modu integralean erantzuteko helburuarekin Zaintza Ekosistema berritzailea sortzeko prozesua abiatu du. Azterketa kualitatiboa egin ostean, zaintza egoeraren hausnarketa herritarra egingo da, pertsona ororen iritzi eta beharrak ezagutzeko.

Biztanleriaren zahartzearen ondorioz, zaintzen inguruko kezkak nabarmen egin du gora, oro har gizartean, eta baita Debako herritarren artean ere.  Horregatik, Debako Udalak zaintza ekosistema berritzailea sortzeko prozesua abiatu du, adinekoak eta pertsona zaintzaileak erdigunean jarriz, adineko pertsonen beharrei modu integralean erantzuteko. Ekimen honen bidez, beraz,  Debako Udalak, adineko herritarren bizi-kalitatea hobetzea du helburu, baina baita gizarte eta komunitate-sarea indartzea ere, adinekoen zaintza gizarte osoaren mesederako den erantzukizun partekatua dela erakutsiz.

Abiatutako lanketa eta Zaintza Ekosistemaren eraketa lehentasunezkoa eta estrategikoa da udal gobernuarentzat, adinekoek eskura dituzten zerbitzuak eta euskarriak indartzeko helburuarekin, haien beharrei modu proaktiboan eta egokian eta sentikortasunez erantzuteko. Zaintza Ekosistemaren sorrerarekin, Deba zaintzen abangoardian izango da, aurrekari esanguratsu bat ezarriko baitu adineko debarren premiei arreta integrala emateko moduan.

Zaintza Ekosistema hori sortzeko, baina, lehenik eta behin egoeraren analisia egin da.  Horretarako, azken hilabeteotan, Matia Fundazioaren gidaritzapean, herriko eragile desberdinez osaturiko disziplina anitzeko taldea osatu da Debako zaintzen egoeraren hausnarketa eta analisi kualitatiboa egiteko.  Orain, zaintza ekosistemaren prozesua bera gizarteratu nahi da eta orain arte egindako lanketa herritarrekin partekatu, guztien iritziak jasotze aldera.

Debako zaintza egoeraren hausnarketa herritarra egiteko ekitaldi eta galdetegia

Ekainaren 30ean antolatutako aurkezpen ekitaldiaren helburu nagusia da debarren iritzia, proposamenak eta beharrak ezagutzea, Debako Zaintza Ekosistema herriko adinekoen zein haien senitartekoen errealitatera ahalik eta gehien hurbildu dadin eta guztien beharrei erantzun diezaien. Halaber, Udalak galdetegi bat sortu du herritarrek beren iritzia emateko aukera izan dezaten. Galdetegia jada eskuragarri dago ondorengo estekan: https://docs.google.com/forms/d/e/1FAIpQLSfEUZb3aBjQWcQivdMfm1V63qVYsLZvrv96Aac8TxodxJfARg/viewform.

Ekainaren 30eko egitaraua:

• 12:00-12:15. Kalean kantuz-en emanaldia eta ekitaldiaren aurkezpena

• 12:15-13:00. Debako zaintza egoeraren hausnarketa herritarra. Zein da zaintzaren egoera Deban? Zein lehentasun izan beharko genituzke?

• 13:00-13:30. Itxiera ekitaldia, Maite Peña, Zainketarako eta Gizarte politiketako Diputatuarekine, Alazne Txurruka Debako alkatearekin eta Iker Aldazabal, 2030 Agendako, Berrikuntzako eta ebaluazioko zuzendari nagusiarekin. kalean Kantuz-en emanaldia. 

Udalak ekitaldian parte hartzeko deia eta gonbita luzatu die herritarrei, “ezinbestekoa da debarren iritziak eta beharrak ezagutzea, zaintza ekosistema guztion artean eraiki dezagun, guztien beharrei erantzun diezaien” nabarmendu du Alazne Txukurra alkateak.