Lehiaketak

Debako Udalak I. eskultura sariketa antolatu du 2018. urterako, arte garaikidea sustatu eta sortzaileei parte hartzeko aukerak emateko helburuarekin.

Bide batez, espazio publikoen itxura hobetu nahi da, erakargarriago egin eta herritarren ohitura osasungarriak sustatzeko, artisten lanari euskarri bat eskainiz eta kultur harreman eta jarduerei bide emanez.

16 urtetik gorako guztiei zabaltzen zaie deialdia, eta indibidualki edo taldean parte hartu ahalko dute. Partehartzaile edo talde bakoitzak lan bakarra aurkeztu ahal izango du sariketara. Aurkeztutako lanak hirugarren batzuek izan ditzaketen eskubideetatik libre egon beharko dira, eta Debako Udalak ez du inolako erantzukizunik edukiko baldintza horiek ez betetzeagatik sor litezkeen auzi edo eztabaidetan.

Kokapena

Eskultura eremu zehatz batean kokatzeko izango da; Debako eskoilera bukaeran kokatzeko, hain zuzen ere. Eremuaren argazkiak atxikituta doaz.

Proiektuak originalak eta argitaratu gabeak izango dira, beste lehiaketa edo sariketa batean hautatu edo saritu gabeak; eta ezingo dira izan egindako edo egiten ari diren beste lan baten ez erreprodukzio oso, ezta partzial ere.

Gaia librea izango da. Teknika eta neurriak ere libreak izango dira, baina bereziki kontuan hartuko da artelanak kokalekuarekiko duen egokitasuna; kasu honetan, Debako eskoilerako pasealeku muturra.

Eskultura lana espazio ireki batean kokatuko denez, epaimahaiak kontuan izango ditu ingurua eta lanaren neurrien arteko proportzionaltasuna eta eskultura egiteko erabiliko diren materialak.

Interesatuek izen-emate orria bete beharko dute parte hartu ahal izateko. Orri hori, aurrerago zehazten den dokumentazioarekin batera, udaletxera bidali beharko da (DEBAKO UDALA, Portu kalea 1, 20820 DEBA), astelehenetik ostiralera, 9:00-14:00 bitartean. Posta zertifikatu bitartez ere bidal daiteke, hartu izanaren agiria eginez gero posta zerbitzuan. Halakoetan korreo elektronikora (artxiboa@deba.eus) bidali beharko da, epe barruan, dokumentazioa aurkeztu izanaren frogagiri hori.

Proiektuak aurkezteko epea 2018ko maiatzaren 25ean, ostirala, eguerdiko 14:00etan amaituko da. Entrega edo itzultze kontuetarako sor litezkeen garraio-gastuak edota bestelakoak partehartzailearen esku geldituko dira. Udalak ez du bere gain hartuko artelanen manipulazioan gerta daitekeen kalte edo galerarik. Behin proiektuak aurkezteko epea amaitutakoan, bidalitako lanen akta jasoko da eta Debako udaletxeko web orrian argitaratuko da: www.deba.eus.

Ineteresatuek izen-emate orriarekin batera, ondorengo dokumentazioa aurkeztu beharko dute:

1. Sobre itxi bat. Kanpoaldean proiektuaren izena besterik ez, eta barruan honako dokumentazioa:
• Izen-emate orria behar bezala beteta.
• Partehartzailearen edo, bere kasuan, taldeko kide bakoitzaren NANaren fotokopia.
• Lanaren exekuziorako aurrekontua. Koste osoa ez da 6.000 eurotik igoko.
• Egilearen edo egileen ibilbide artistikoaren laburpena.
• Proiektuaren deskribapen memoria: erabiliko diren materialak, bukaerak eta exekuzio prozesua zehaztuz.
• Artisten zinpeko deklarazioa, aurkeztutako lana originala eta argitaratu gabea dela ziurtatzen duena.
• Lana exekutatzeko konpromisoa, aurkeztutako proiektua irabazle suertatuko balitz.
2. Proiektuaren maketa, gehienez ere, 50 x 50 x 50 cm tamainakoa; soilik proiektuaren izena (lehen aipatutako gutunazalean idatzitako berbera) agertzen den paketatzean aurkeztuko da. Maketarekin batera honako hauek:

• Bukaerako artelanaren neurriak, planoak, perspektibak, bozetoak eta fotomuntatzea.
• Argazkiak .jpg edo .pdf formatuan eta, gehienez ere, 150 pppko erresoluzioarekin (teknika, neurriak, e.a.).
• Epaimahaiak artelana hobeto ulertzeko, egileek beharrezkotzat jotzen dituzten deskribapen datuak.

Izaera pertsonalen datu babeserako 15/1999 Lege organikoak, abenduaren 13 koak, xedatutakoaren arabera egingo da datu pertsonalen trataera.

Arte munduko profesionalek, kultura zinegotziak eta Haitz-haundi elkarte artistikoko kide batek osatuko dute epaimahaia.

Kalitate artistikoa, originaltasuna eta oinarrietan bildutako betebeharrekiko egokitzapena izango dira proposamen irabazleak aukeratzeko epaimahaiak erabiliko dituen irizpideak.

Gaia librea izango da, artista bakoitzaren ikuspegi pertsonalaren araberakoa; gainera, aurkezten duen gaiarekiko ikuspegi baikorra adierazi behar du.

Deialditik kanporatuta geldituko dira:

1. Genero bortizkeriaren edo edozein motatako biolentziaren apologia egiten duten bozetoak; baita eduki politikoa, arrazista, sexista, xenofoboa… dutenak ere.
2. Beste artista batzuen lanen plagioak.
3. Beste lehiaketa edo sariketetan saritutako lanak.

Dena dela, epaimahaiak hutsik laga ahal izango du sariketa, aurkeztutako proposamenek baldintza egokirik ez dutela betetzen uste badu. Epaimahaiaren erabakia apelaezina izango da, eta hark oinarrietan aurreikusi gabeko edozein gertaera erabakitzeko ahalmena izango du.

Sariketak bi fase izango ditu:

a) Hautaketa fasea: aurkeztutako bozetoetatik berritzaileenak, esanguratsuenak eta espresio handiena dutenak aukeratuko ditu epaimahaiak, sormen, originaltasun eta kalitate irizpideei jarraiki. Hamar pertsona edo talderen lanak aukeratu ahal izango ditu gehienez ere, eta horiek izango dira finalera pasako direnak.

2018ko ekainaren 1ean aukeratuen zerrenda argitaratuko da Debako Udalaren webgunean: www.deba.eus.

b) Finaleko fasea: irabazlea herritarren bozketa bidez aukeratuko da, eta besteak erreserban geratuko dira. Bi modu egongo dira bozketarako. Bata, presentziala: Udalak Agirre jauregiko erakusketa gelan ipiniko ditu lanak 2018ko ekainaren 8, 9 eta 10ean zuzenean bozkatu ahal izateko. Bestea, online: 2018ko ekainaren 8tik 15era bitartean Debako Udalaren web orriaren bidez.

2018ko ekainaren 22an argitaratuko da irabazlearen izena eta zuzenean 4.000 €-ko ordaina jasoko du.

Garraio edota ostatu gastuak ez dira antolatzaileen kontura izango.

Proiektu irabazleak gehienez 3 hilabeteko epea izango du artelana gauzatzeko (amaitutako lanak aurkeztutako bozetoarekin bat etorri beharko du).

Behin lana eginda, zuzen exekutatuta eta amaituta dagoela ziurtatuko du epaimahaiak, eta orduan jasoko ditu irabazleak gainontzeko 2.000 euroak.

Proiektua egiterakoan segurtasunari dagokionez indarrean dagoen araudia betetzeko konpromisoa hartzen dute partehartzaileek. Antolakuntza ez da horiek ez betetzeagatik sor litezkeen ondorioen erantzule izango. Sariketa honetan parte hartzeak oinarri hauek guztiak onartzen direla esan nahi du.

Debako Udalak I. mural/grafiti sariketa antolatu du arte garaikidea sustatzeko eta mural, grafiti, urbanart, streetart... sortzaileei paneletan esku hartzeko aukera emateko.

Bestalde, espazio publikoen itxura hobetu nahi da eta erakargarriago egin, bide batez, artisten lanari euskarri bat eskainiz eta harreman eta kultur jarduerei bide emanez.

16 urtetik goragoko guztiei zabaltzen zaie deialdia, eta indibidualki edo taldean (crew modura) parte hartu ahalko dute.

Interesatuek izen-emate orria bete beharko dute parte hartu ahal izateko. Orri hori, aurrerago zehazten den dokumentazioarekin batera, udaletxera bidali beharko da (DEBAKO UDALA-Portu kalea 1, 20820 DEBA) edo web orriaren bitartez (www.deba.eus) helarazi beharko da.

Horretarako epea 2017ko ekainaren 16an, ostirala, eguerdiko 14:00etan, amaituko da.

Sariketako jendaurreko ekitaldia 2017ko uztailaren 16an, igandea, ospatuko da.

1. Egin nahi den proiektuaren bozetoa (teknika, neurriak, e.a.), A3 tamainan, .jpg edo .pdf formatuan eta, gehienez ere, 150ppp-ko erresoluzioarekin. Gaia librea izango da, artista bakoitzaren ikuspegi pertsonalaren araberakoa (baina Debako historiarekin, paisajearekin, ohiturekin,… lotutakoak baloratuko dira).
2. Partehartzaileek edo taldeek lehendik eginda dauzkaten muralen/grafitien/lanen argazkiak; gutxienez, hirurenak.
3. Parte hartzailearen edo, bere kasuan, taldeko kide bakoitzaren NANaren fotokopia.
4. Debako Udalari zuzendutako agiria, sariketara aurkeztutako obrak osorik edo partzialki argitaratzeko, erreproduzitzeko edo zabaltzeko baimena emanez eta hortik eratorritako edozein motatako erreklamaziori berariaz uko eginez, apirilaren 12ko 1/1996 Legegintzako Errege Dekretuak (Jabetza Intelektualaren gaineko Legearen testu bategina onartzen duenak) agindutako terminoetan, egileak edo taldearen ordezkariak sinatua.
5. Debako Udalari zuzendutako agiria, aurkeztutako lanak sariketaren finaleko fasean edo egoki iritzitako beste edozein erakusketatan erakusteko baimena emanez, egileak edo taldearen ordezkariak sinatua.
6. Artisten zinpeko deklarazioa, aurkeztutako lana originala eta argitaratu gabea dela ziurtatzen duena.

Datu pertsonalen trataera izaera pertsonalen datu babeserako 15/1999 Lege organikoak, abenduaren 13koak, xedatutakoaren arabera egingo da.

Arte munduko profesionalek, Kultura zinegotziak, Debako Turismo teknikariak, Haitz Haundi elkarte artistikoko kide batek eta Arte eskolako zuzendariak osatuko dute epaimahaia.

Kalitate artistikoa, originaltasuna eta onarrietan bildutako betebeharrekiko egokitzapena izango dira irabazleak aukeratzeko epaimahaiak erabiliko dituen irizpideak.

Deialditik kanporatuta geratuko dira:

1. Genero bortizkeriaren edo edozein motatako biolentziaren apologia egiten duten bozetoak; baita eduki politikoa, arrazista, sexista, xenofoboa… dutenak ere.
2. Beste artista batzuen lanen plagioak.
3. Beste lehiaketa edo sariketetan saritutako lanak.

Dena dela, epaimahaiak hutsik laga ahal izango ditu sariak, aurkeztutako proposamenek baldintza egokirik ez dutela betetzen uste badu.

Epaimahaiaren erabakia apelaezina izango da eta, hark, oinarrietan aurreikusi gabeko edozein gertaera erabakitzeko ahalmena izango du.

Sariketak bi fase izango ditu:

a) Hautaketa fasea: aurkeztutako bozetoetatik berritzaileenak, esanguratsuenak eta espresio artistiko handiena dutenak aukeratuko ditu epaimahaiak, sormen, originaltasun eta kalitate irizpideei jarraiki. Hamar pertsona edo talderen lanak aukeratu ahal izango ditu gehienez ere eta horiek izango dira finalera pasako direnak.

2017ko ekainaren 16an aukeratuen zerrenda argitaratuko da udalaren webgunean.

b) Finaleko fasea: 4 finalistak herritarren bozketa bidez aukeratuko dira eta besteak erreserban geratuko. Bi modu egongo dira bozketarako. Bata presentziala: udalak Agirre jauregiko erakusketa gelan ipiniko ditu lanak 2017ko ekainaren 23, 24 eta 25ean zuzenean bozkatu ahal izateko. On line bidez bestea: ekainaren 23tik 30era bitartean Debako udalaren web orriaren bidez.

Udalak jendaurreko ekitaldia antolatuko du aukeratutako pertsona edo taldeek euren lanak gauza ditzaten. Horretarako, 3,60 x 2,40 m.inguruko panelak jarriko dizkie eskura. Egileek, eurek aurkeztutako bozetora lerratu beharko dute; lana ere bozetoa aurkeztu zuten pertsonek edo taldeek egin beharko dute.

Muralak egiteko materiala (margoak, espraiak, eskilarak, e.a.) partaideek ekarri beharko dute; udalak 150€ emango dizkie beharrezkoa eros dezaten.

Ekitaldia Deban burutuko da 2017ko uztailaren 16an. Partaideek ez dute ordainik jasoko etortze hutsagatik. Desplazamendu, ostatu, edo horrelako gasturik ez du antolakuntzak bere gain hartuko

Hautatutako proposamenak goizeko 9etatik arratsaldeko 7etara bitartean gauzatu beharko dira eta, lehen esan bezala, aurkeztutako bozeto originalarekin bat etorri beharko dute.

Behin amaitutakoan lana zuzen exekutatu eta amaitu dela ziurtatuko du epaimahaiak eta artistak edo artistek 1.000 euroko ordaina jasoko du(te).

Antolakuntzak bere gain hartuko du artistentzako jatordu bat.

Parte hartzaileek, bestalde, segurtasun kontuetan indarrean dagoen araudia betetzeko konpromisoa hartzen dute, maskarak erabiliz e.a. Antolakuntza ez da horiek ez betetzeagatik sor litezkeen ondorioen erantzule izango.

Sariketa honetan parte hartzeak, oinarri hauek guztiak onartzen direla esan nahi du.